ජනාධිපති ගරු මෛතී‍්‍රපාල සිරිසේන මැතිතුමා මේ බව ප‍්‍රකාශ කළේ, අද (25) පෙරවරුවේ ජනාධිපති නිල නිවසේ දී විදෙස් ජනමාධ්‍යවේදින් සමග පැවති හමුවකදී ය.
2015 ජනවාරි 08 වනදා මේ රටේ ජනතාව තමා ජනාධිපති ධූරයට පත් කරගත්තේ ඉතා පිරිසිදු රාජ්‍ය පාලනයක් උදෙසා බව සඳහන් කළ ජනාධිපතිතුමා ඒ උදෙසා ඉතාමත් සද් භාවයෙන් නිවැරදි ගමනක් යාමට සූදානම් වුව ද රනිල් වික‍්‍රමසිංහ මහතා අගමැති ධූරයට පත්කර මාස තුනක් යනවිට සිදුවූ මහා මංකොල්ලය වන මහ බැංකු මූල්‍ය වංචාව එම ගමන අඩාල කළ බව ද සඳහන් කළේ ය.
දිගින් දිගටම සිදුවූ අක‍්‍රමිකතාවයන් මෙන්ම හිටපු අගමැතිවරයාගේ අදුරදර්ශී සහ හිතුවක්කාරී කි‍්‍රයා පිළිවෙත හේතුවෙන් අගමැතිවරයා වෙනස් කර රටත්, ජනතාවත් වෙනුවෙන් සුබවාදී ගමනක් යාමේ නව මාවතක්
තෝරා ගැනීමට තමාට සිදුවූ බව ද ජනාධිපතිතුමා සිහිපත් කළේ ය.
තමන් ඝාතනය කිරීමට උත්සහ දැරු දූෂිතයන් සමඟ තවදුරටත් ආණ්ඩු කිරීමට නම් තමන් රට වෙනුවෙන් නොව තමන් වෙනුවෙන් අපේක්ෂා ඉටු කර ගැනීමට වෙර දරන දූෂිත දේශපාලනඥයෙකු විය යුතු බව සඳහන් කළ ජනාධිපතිතුමා තම දේශපාලන ප‍්‍රතිපත්තිය එය නොවන අතර දැඩි ලෙසම දූෂණයට විරුද්ධ තමන් නිරන්තරයෙන් ප‍්‍රජාතන්ත‍්‍රවාදයට ගරු කරමින් ආණ්ඩුක‍්‍රම ව්‍යවස්ථාවට අනුව කටයුතු කරන අයෙක් බව ද ප‍්‍රකාශ කළේ ය.
පසුගිය 14 වනදා පාර්ලිමේන්තුවේ විශ්වාසභංග යෝජනාව ඉදිරිපත් වූයේ ස්ථාවර නියෝග අනුව කි‍්‍රයාත්මක විය යුතු පිළිවෙතට නොවන අතර ආණ්ඩුවක් පත් කර ගැනීම සහ ආණ්ඩුවක් වෙනස් කර ගැනීම යන ඉතා වැදගත් කාරණාවලට අදාළව විශ්වාසභංග යෝජනාවක් පාර්ලිමේන්තුවේ සම්මත කර ගැනීමේ දී හඬ අනුව නොව ඉලෙක්ට්‍රොනික් ඡුන්ද ක‍්‍රමය හෝ නමින් ඡන්ද විමසීම වැනි විධිමත් ක‍්‍රමයක් භාවිතා විය යුතු බවත් ඒ පිළිබඳව ද තමා කතානායකවරයා ඇතුළු පක්ෂ නායකයන්ගෙන් කළ ඉල්ලීම පිළිගෙන ඒ අනුව කටයුතු කිරීම පිළිබඳ සතුටු වන අතර එම සියලූදෙනාට ස්තූතිය පළ කරන බව ද ප‍්‍රකාශ කළේ ය.
මෙහිදී ජනාධිපතිතුමා වැඩිදුරටත් ප‍්‍රකාශ කළේ කිසිදු අවස්ථාවක රනිල් වික‍්‍රමසිංහ මහතා නැවත අගමැති ධූරයට පත් නොකරන අතර එය මේ වන විට තමා එක්සත් ජාතික පක්ෂයට පැහැදිළිව සඳහන් කර තිබෙන බවයි. එමෙන්ම මහබැංකු මහා මංකොල්ලය සේම රනිල් වික‍්‍රමසිංහ මහතා අගමැති ධූරයේ කටයුතු කළ කාලය තුළ එනම් 2015 සිට 2018 ඔක්තෝබර් 25 වනදා දක්වා කාලය තුළ ආණ්ඩුවේ සිදුවූ වංචා, දූෂණ සහ අක‍්‍රමිකතා පිළිබඳ සෙවීමට ජනාධිපති කොමිසමක් පත් කිරීමට කටයුතු කරන බවත් ඒ තුළින්න් ඔවුන්ගේ තවත් වංචා, දූෂණ සහ අක‍්‍රමිකතා රැසක් රටට සහ ජනතාවට අනාවරණය වනු ඇති බවත් ජනාධිපතිතුමා සඳහන් කළේ ය.
