යක්කල පැවති වැඩසටහන යක්කල ලංකා ලෝහ පුද්ගලික සමාගම් පරිශ්‍රයේදී පැවති අතර මෙම ජාතික සමගිය හා සංහිඳියා ''අහන්න'' වැඩසටහනේ සම්පත්දායකයන් ලෙස නිදහසේ වේදිකාවේ සංවිධායක ප්‍ර‍සන්ග ප්‍ර‍නාන්දු, සාධාරණය සඳහා වූ ''ජනපවුරු '' සංවිධානයේ සභාපති ජයලත් බණ්ඩාර සෙනෙවිරත්න යන මහත්වරුන් එක්ව සිටියහ.
හේන්පිටමුල්ලේ කේ.විමලවංශ හිමි, ලංකා ලෝහ පුද්ගලික සමාගමේ සභාපති, කළමනාකාර අධ්‍යක්ෂක, විධායක අධ්‍යක්ෂක, යක්කල පොලීසියේ පොලිස් ස්ථානාධිපති පොලිස් පරීක්ෂක වල්පොළ මහතා ඇතුළු ජනතාව මෙම අවස්ථාවට එක්ව සිටියහ. එසේම තවත් '';අහන්න'' වැඩසටහනක් පයාගල, මලයගොඩ ශ්‍රී පුෂ්පාරාම මහාවිහාරයේදී පයාගල පොලිස් ස්ථානාධිපති පොලිස් පරීක්ෂක ගුණතිලක මහතාගේ ප්‍රධානත්වයෙන් ප්‍ර‍ජා පොලිස් කොට්ඨාසයේ සහභාගිත්වයෙන් පැවැත්විණි. මෙම වැඩසටහනේ සම්පත්දායකයින් ලෙස මාතර දිස්ත්‍රික් ජාතික ඒකාබද්ධ නිලධාරී සුදර්ශන විධානපතිරණ, සිවිල් සංවිධාන එකමුතුවේ ක්‍රියාකාරී ජයන්ත පීරිස් යන මහත්වරුන් එක්ව සිටි අතර සංහිඳියා යාන්ත්‍ර‍ණ සම්බන්ධීකරණ ලේකම් කාර්යාලයේ අධ්‍යක්ෂ සංජීව විමලගුණරත්න මහතා ඇතුළු ජනතාව මෙම අවස්ථාවට එක්ව සිටියහ.
මෙරට පැවති 30 වසරක යුද්ධය නිමා කර සියලු ජාතීන් අතර සමඟිය සහ සංහිඳියාව හා අන්‍යොන්‍ය විශ්වාසය තහවුරු කරමින් එකම ශ්‍රී ලාංකික ජාතියක් ලෙස නැගී සිටීමට අපේක්ෂා කළ නමුත් පසුගිය දශකයට ආසන්න කාලය තුළ උතුරු නැගෙනහිර යුද්ධය නිමා කළත් රටේ ජනතාව අපේක්ෂා කළ ජාතික සංහිඳියාව ගොඩනැගීම සඳහා පසුගිය කාලපරිච්ජේදයේ විධිමත් වැඩපිළිවෙළක් නොමැති විය. ඒ හේතුවෙන් ජාතීන් අතර ආගම් අතර විශ්වාසය බිඳවැටී යම්යම් අවාසනාවන්ත සිදුවීම් පසුගියදා වාර්තා වූ අතර එවන් පසුබිමක් යළි නිර්මාණය නොවීම සඳහා රජය සියලු ජාතීන් ඒකරාශි කිරීම සඳහා තිරසර වැඩපිළිවෙළක් ආරම්භ කරමින් “අහන්න” ජාතිත සංහිඳියා වැඩසටහන ආරම්භ කළ බව මුදල් හා ජනමාධ්‍ය අමාත්‍යාංශය අවධාරණය කරයි.
නව ගෝලීය ආර්ථික ප්‍රවණතා හඳුනාගනිමින් සංවර්ධනයේ ඉලක්කයන් කරා ළඟාවීමට නම් ග්‍රාමීය මට්ටමේ සිට සියලු ජාතීන්, සියලු ආගම් එකට සහෝදරත්වයෙන් ජීවත් වීම උදෙසාත් ආර්ථික වශයෙන් සමෘද්ධිමත් ජාතියක් බිහි කිරීම උදෙසාත් ආකල්පමය වෙනසකට රට ගමන් කිරීම මෙම වැඩසටහනේ අරමුණ බව මුදල් හා ජනාමාධ්‍ය අමාත්‍ය මංගල සමරවීර මහතා අවධාරණය කරයි.
