කොළඹ ජාතික රෝහලට අනුබද්ධව ඉදිකෙරෙන මෙම ගොඩනැගිලිවල පවතින අඩුපාඩු සහ එම ඉදිකරීම් කටයුතු හැකි ඉක්මණින් අවසන් කිරීම සඳහා අදාල කොන්ත‍්‍රාත් සමාගම් වෙත උපදෙස් ලබාදීම අරමුණු කර ගනිමින් සෞඛ්‍ය අමාත්‍යවරයා මෙම විශේෂ නිරීක්ෂණ චාරිකාවෙ නිරත වී තිබේ.
දැනට අපස්මාර රෝග කටයුතු සහ දන්ත වෛද්‍ය සේවා කටයුතු කොළඹ ජාතික රෝහලේ එක් එක් ස්ථානවල පවත්වාගෙන යන අතර, එම නිසා ප‍්‍රතිකාර ලබාගැනීම සඳහා පැමිණෙන රෝගීන්ට ද විශාල අපහසුතාවයන්වලට ලක්වීමට සිදුව ඇත.
මෙම ඉදිකිරීම් කටයුතු අවසන් කිරීමත් සමග එම ප‍්‍රතිකාර සේවාවන් සඳහා පැමිණෙන රෝගීන්ට එකම ස්ථානයකින් අවශ්‍ය සියළුම ප‍්‍රතිකාර සේවාවන් කිසිදු අපහසුතාවකින් තොරව ලබාගත හැකියාව ලැබේ.
මෙම ඉදිකිරීම් කටයුතු සිදුකරන ජාතික දන්තායතන ගොඩනැගිල්ල හා අපස්මාර රෝග ප‍්‍රතිකාර ඒකක ගොඩනැගිල්ල තුළ බාහිර රෝගී ප‍්‍රතිකාර පහසුකම්, හදිසි ප‍්‍රතිකාර පහසුකම්, නේවාසික ප‍්‍රතිකාර, ශල්‍යකර්ම, ඖෂධ ගබඩා පහසුකම් සහ රෝගීන්ගේ දත්ත ගබඩා කිරීමේ නවීන පහසුකම් ආදී සියළු පහසුකම්වලින් සමන්චිත වේ.
මෙම නිරික්ෂණ චාරිකාවට එක්වෙමින් සෞඛ්‍ය අමාත්‍යවරයා කියා සිටියේ මෙම ගොඩනැගිලිවලට අඩුපාඩුව පවතින සියළු උපකරණ 2016 අයවැය මගින් සෞඛ්‍ය අමාත්‍යාංශයට වෙන්කරන මුදලින් කඩිනමින් ලබාදීමට පියවර ගන්නා බවත්, අවශ්‍ය විශේෂඥ වෛද්‍ය, වෛද්‍ය, හෙදි ඇතුළු සෞඛ්‍ය කාර්ය මණ්ඩල ද ඉතා ඉක්මණින් ලබාදීමට කටයුතු කරන බවත්, හැකි ඉක්මණින් මෙහි ඉදිකිරීම් කටුයතු අවසන් කර ජනතා අයිතියට පත්කිරීම සඳහා අවශ්‍ය කටයුතු සිදු කිරීමට පියවර ගන්නා ලෙසත්, අදාල අංශ වෙත උපදෙස් දෙන ලදි.
මෙම අවස්ථාවට සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය පාලිත මහීපාල මහතා, ස්නායු රෝග විශේෂඥ වෛද්‍ය රංජනී ගමගේ මහත්මිය, දන්තායතනයේ අධ්‍යක්ෂ එම්.වයි.කේ විල්ප‍්‍රට් මහතා, නව අධ්‍යක්ෂ චන්දන ගජනායක මහතා ඇතුළු පිරිසක් එක්ව සිටියහ.
