කොළඹ වරායේ පවතින අධික තදබදය හා කලාපීයව ගොඩනැගෙන නව ආර්ථික ප‍්‍රවණතාවන්ට ගැළපෙන ලෙස වරාය ක්ෂේත‍්‍රය සංවර්ධනය කිරීම ද මෙම සංවර්ධන අභිලාෂයන්හි ප‍්‍රමුඛ කාර්යයකි. ඒ යටතේ ඉදිවුණු කොළඹ වරාය දකුණු සංවර්ධන යෝධ ව්‍යාපෘතිය මේ වන විට ඉතා ජයග‍්‍රාහී මට්ටමක පවතී.
ඒ යටතේ කි.මී. 6.8කින් යුත් නව දියකඩනයක් ඉදි වු අතර, නව නියමු මධ්‍යස්ථානයක්, ඉන්ධන මෙහෙයුම් නව නළ පද්ධතියක්, ගැඹුරු කරන ලද නෞකා ප‍්‍රවේශ ඇළ මාර්ගයක් ඉදිවූ අතර, ව්‍යාපෘතිය තුළ ප්රථම පර්යන්තය ලෙස කොළඹ ජාත්‍යන්තර බහාලු පර්යන්ත සමාගම (CPEP) සිය පර්යන්තය ඉදිකළේ ය.
මේ සඳහා වන ගිවිසුම ශ්රී ලංකා වරාය අධිකාරිය හා චයිනා මර්චන්ට් හෝල්ඩිං සමාගම අතර සිදුවිය.
එය BOT වර්ගයේ (ඉදිකර, මෙහෙයුම්කර, පවරාදීමේ) ගිවිසුමක් වුණු අතර, එය රජය හා පුද්ගලික අංශය එක්ව සිදුකරන ව්‍යාපාරික අවස්ථාවක් ලෙස වර්ග කෙරේ. මෙහි මෙහෙයුම් කටයුතු පසුගිය වසරේ අගෝස්තු 05 වන දින ජනාධිපතිතුමන් විසින් ශුභ මොහොතින් ආරම්භ කරන ලදී.
බහාලු තැන්පත් කිරීමේ මංතීරූ 12ක් හා ශීතරකණ බහාලු තැන්පත් කිරීමේ පහසුකම් ද පර්යන්තය සතුවේ. මේ සෑම ස්ථානයක්ම නවීන පර්යන්ත කළමනාකරණ ක‍්‍රමවේදයන්ට හා පරිසර හිතකාමී ලෙස කළමනාකරණය කිරීමට සැලසුම් කොට ඇත.
කොළඹ වරාය පුළුල් කිරීමේ ව්‍යාපෘතියේ යටිතල පහසුකම් සඳහා සම්පූර්ණ වියදම ලෙස ඇ.ඩො. මිලියන 330ක් ගණන් බලා ඇත. මෙයින් 81.7% හෙවත් ඇ.ඩො.මිලියන 300ක මුදලක් ආසියානු සංවර්ධන බැංකුව විසින් දරන ලද අතර, ඉතිරි 18.3%ක මුදල ශ්රී ලංකා වරාය අධිකාරිය විසින් දරන ලදී.
ශ්රී ලංකා වරාය අධිකාරිය
සැකසුම - එනූෂා බණ්ඩාර
