ඌවේ එ.ජා.ප. මහ ඇමති අපේක්‍ෂක හරීන් ප‍්‍රනාන්දු මහතාගේ පරාජය අපේක්‍ෂා කරන රනිල් වික‍්‍රමසිංහ මහතා ඌවේ ඡන්ද සටන අතහැර උතුරු මැදට පැමිණ සජිත්ගේ නම විකුණමින් සිටින බව ආර්ථික සංවර්ධන නියෝජ්‍ය අමාත්‍ය සහ විශේෂ ව්‍යාපෘති අමාත්‍ය එස්.එම්. චන්ද්‍රසේන මහතා පැවසීය.
අමාත්‍යවරයා එම අදහස් පළ කර සිටියේ කලාවැව මැතිවරණ කොට්ඨාසයේ ගොවීන් සඳහා දිවි නැඟුම ව්‍යාපෘතිය යටතේ රුපියල්75,000ක් වටිනා වතුර මෝටර් බෙදා දුන් අවස්ථාවට එක්වෙමිනි. ගල්නෑවේ පැවති මේ උත්සයේදී රුපියල් 21,000ක් වටිනා වතුර මෝටර් වසරක කාලයක් තුළ ගෙවීමේ පදනම මත ලබා දී ඇත.
මෙම උත්සවය අමතමින් අමාත්‍යවරයා මෙසේද කීය. "තම දේශපාලන ජීවිතයේදී කවදත් උතුර දකුණ වරද්දා ගෙන තබන තබන හැම මැතිවරණයෙන් ම අන්ත පරාජයක් උරුම කරගෙන සිටින රනිල් වික‍්‍රමසිංහ මහතා ඌව පළාත් සභා මැතිවරණ සටන අතහැර උතුරු මැද ගල්නෑවට පැමිණ රැස්වීම් තබා ඇත්තේ සජිත් පේ‍්‍රමදාස මහතාගේ නම විකුණමින් බව ද කීය. ගල්නෑවේ ගොවි හමුවට සජිත් පේ‍්‍රමදාස මහතා පැමිණෙන බවට දැවන්ත පෝස්ටර් ගසා මහා ප‍්‍රසිද්ධියක් දී ජනතාව ඒකරාශී කලත් සජිත් පේ‍්‍රමදාස මහතා එම රැස්වීමට නොපැමිණි නිසා රනිල් විසින් රවටන ලද පාක්‍ෂිකයන් බැණ බැණ ගොස් ඇති බවද කීය.
සජිත් පේ‍්‍රමදාස මහතා ඌවේ ජනතාව අමතන බවට පෝස්ටර් ගසා තිබුණත් සජිත් ඌවේ මැතිවරණය මගහැර සිටින බවත් රනිල් හා සජිත් එකිනෙකාට බියෙන් සැකෙන් මේ යන ගමන එ.ජා.ප.යේ අවසන් ගමන වන බවත් කීය."
NDH
