මෙම වැඩපිළිවෙළ යටතේ තෝරාගත් රණ විරුවන් සඳහා ඔවුන් විසින් ඉදිකරමින් පවතින නිවාස තම පවුලේ සාමාජිකයන් සමග සතුටින් කල් ගත කිරීමට අවශ්‍ය වන පරිදි වැඩ අවසන් කර ගැනීමට උපරිම වශයෙන් ලක්ෂ 7 1/2 (හත හමාරකට) යටත්ව අවශ්‍ය ඉංජිනේරු ද්‍රව්‍යයන් ලබාදීම සිදු කෙරේ. සම්පූර්ණ වශයෙන් රජයේ මුල්‍ය ප්‍රතිපාදන මත සිදු කරන මෙම ව්‍යාපෘතිය ත්‍රිවිධ හමුදාවන්හි සම්බන්ධීකරණය හා සුපරීක්ෂණයෙන් ද රාජ්‍ය ආරක්ෂක හා නාගරික සංවර්ධන අමාත්‍යාංශයේ සේවා වනිතා ඒකකයේ පූර්ණ අධීක්ෂණය යටතේ ක්‍රියවට නංවා ඇත.
රජයේ අයවැය ප්‍රතිපාදන තුළින් වෙන් කරන ලද රුපියල් මිලියන 1000 ක් මේ සඳහා යොදවා ඇති අතර මෙම වර්ෂයේ දී මෙන් ම ලබන වසරේ ද වෙන් කර ඇති ප්‍රතිපාදන මගින් මෙසේ අදියරෙන් අදියර තෝරා ගනු ලබන රණවිරුවන් 2000 කට අධික පිරිසකගේ නිවාස සිහිනය මෙමගින් යථාර්ථයක් බවට පත්වනු ඇත.
මේ අනුව අද පැවති උත්සවයේ දී ශ්‍රී ලංකා යුධ හමුදාවේ 296 දෙනෙකු ද, නාවික හමුදාවේ 47 දෙනෙකු හා ගුවන් හමුදාවේ 27 දෙනෙකු සඳහා එකී ලිපි භාරදීම ආරක්ෂක ලේකම්තුමා අතින් සිදු කෙරිණි.
මෙම අවස්ථාව සඳහා ආරක්ෂක හා නාගරික සංවර්ධන අමාත්‍යාංශයේ සේවා වනිතා ඒකකයේ සභාපතිනිය වන අයෝමා රාජපක්ෂ, ආරක්ෂක මාණ්ඩලික ප්‍රධානී ජෙනරාල් ජගත් ජයසුරිය, ත්‍රිවිධ හමුදාපතිවරුන්, ආරක්ෂක හමුදාවන්හි සේවා වනිතා ඒකකවල සභාපතිනියන් හා සුභසාධක නිලධාරීන් ආරක්ෂක අමාත්‍යාංශයේ ජ්‍යේෂ්ඨ නිලධාරීන්, ජ්‍යේෂ්ඨ හමුදා නිලධාරීන් හා තෝරා ගනු ලැබූ රණ විරුවන් හා ඔවුන්ගේ පවුල්වල සාමාජිකවරු ද සහභාගී වූහ.
DB/MOD
