මෙහිදී අමාත්‍යවරිය විසින් ප්‍රථමයෙන්ම එගොඩ වලේගොඩ, කොවුල්කැටිය විදුලි ව්‍යාපෘතිය ජනතා අයිතියට පවරන ලදී. මේ සඳහා රජය විසින් වැය කරන ලද මුදල රු.17,500,000කි. මෙමගින් නිවාස 189කට විදුලිය පහසුකම් සැපයේ. හතරබාගේ, නියඳකොළ යාය විදුලි යෝජනා ක්‍රමය ජනතා අයිතියට පත්කරන ලද අතර ඒ සඳහා රජය වැයකළ මුදල ර.15,600,000කි. මෙමගින් නිවාස 89ක් සඳහා විදුලිය සැපයේ. කීනගහඇල්ල විදුලි දිගුව ජනතා අයිතියට පත් කළ අතර එමගින් පවුල් 12කට විදුලිය සැපයේ. මේ සඳහා රජය විසින් වැයකළ මුදල රු. 1,400,000කි. ඒ අනුව මෙම ව්‍යාපෘති තුන සඳහා රජය වැය කළ මුදල රු. 34,500,000ක් වන අතර ඉන් නිවාස 287 සඳහා විදුලිය හිමි වේ.
"අතිගරු ජනාධිපතිතුමා මට විදුලිබල අමාත්‍යංශය බාරදීලා, මට ඉලක්කයක් දුන්නා. ගමෙන් බිහිවුණ නායකයෙක් හැටියට, කුප්පි ලාම්පුවෙන් පාඩම් කරන දරුවන්ගේ දුක දන්න නායකයෙක් හැටියට, දෙමව්පියන් ඉන්න තැනින්, දරුවන් ඉහළට ගන්න වෙරදරන නායකයෙක් හැටියට, එතුමා මට දුන්න ඉලක්කය තමයි, 2014 අවසන් වෙද්දි ලංකාවේ සෑම ගමකටම විදුලිය දෙන්න කියන එක".දෙමාපියන්ගේ රැකියාව, දරුවටත් උරුම වෙන්න අතිගරු ජනාධිපතිතුමා ඉඩ නොතබන බවත් දරුවන් ව හොඳ තැනකට ගේන්න එතුමා කටයුතු කරන බවත් පෙන්වා දුන් අමාත්‍යවරිය ඊට අවශ්‍ය යටිතල පහසුකම්, මුදල් ලැබෙන බවත් පෙන්වා දුන්නේය.
මෙම අවස්ථාවට සබරගමුව පළාත් සභා සභාපති කංචන ජයරත්න, සබරගමුව පළාත් අධ්‍යාපන, සංස්කෘතික සහ තොරතුරු තාක්ෂණික අමාත්‍ය භානු මුනිප්‍රිය, සබරගමුව පළාත් සභා මන්ත්‍රී සාලිය එල්ලාවල යන මහත්වරු ඇතුළු විශාල පිරිසක් සහභාගී වූහ.
DB
