අගමැතිවරයාගේ සම්පූර්ණ පණිවුඩය පහත සඳහන් පරිදි වේ.
"මැයි දින පණිවුඩය
සමාජ ප්‍රගමනය උදෙසා තම දහදිය, ශ්‍රමය කැප කරමින් දායක වන, වැඩ කරන ජනතාවගේ දිනය අද ය.
කම්කරු ජනතාව සමස්ත සමාජය වෙනුවෙන් ඉටුකරන මෙහෙවරට කෘත ගුණ දක්වන, ඔවුන්ගේ ශ්‍රම දායකත්වය අගයන, එයට නිසි වටිනාකමක් ලබා දෙන, ඔවුන්ගේ සුබ සිද්ධිය වෙනුවෙන් අවැසි ක්‍රියා මාර්ග ගැනෙන, ඒ සඳහා විධිමත් කතිකාවන් බිහිවන දවසක් බවට මැයි දිනය පත් කරගැනීම අප සැමගේ වගකීම වේ.
කම්කරු ජනතාව වෙනුවෙන් පෙනී සිටින වෘත්තීය සමිති, දේශපාලන අවශ්‍යතාවලට වඩා වැඩ කරන ජනතාවගේ සේවක අයිතීන් සහ අවශ්‍යතාවලට ප්‍රමුඛත්වය දී කටයුතු කිරීම කම්කරු ජනතාවගේ මෙන් ම රටේ ද යහපතට හේතු වනු ඇත. ඒ සඳහා අවැසි පසුබිම සකසා දීම රජයේ ද අභිලාෂය වේ.
කම්කරු ජනතාවගේ වැඩබිමේ අරගලය මෙන්ම ජීවන අරගලය ද ජයගන්නට මැයි දිනය නව ජවයක් ගෙනෙනු ඇතැයි අපේක්ෂා කරමි. ජය පතමි.
රනිල් වික්‍රමසිංහ
අග්‍රාමාත්‍ය"
