බාල පොහොර ගෙනවිත් බෙදා හැර නැති අතර අවශ්‍ය රසායනාගාර පිහිටුවා තිබෙන බවත් රටට ගෙනෙන සෑම පොහොර වර්ගයක් ම අවස්ථා තුනකදී පරීක්ෂා කරන බවත් කෘෂිකර්ම අමාත්‍ය මහින්ද යාපා අබේවර්ධන මහතා පැවසීය.

තල්, පොල්, කිතුල්, කෙසෙල්, සේසත්, ලාක්ෂා, මැටි, කොහු ආදී වශයෙන් වූ මේ සෑම ක්ෂේත්‍රයක් කෙරෙහි ම මේ අමාත්‍යාංශය අවධානය යොමු කර තිබෙන බව සාම්ප්‍රදායික කර්මාන්ත හා කුඩා ව්‍යවසාය සංවර්ධන නියෝජ්‍ය අමාත්‍ය වීරකුමාර දිසානායක මහතා පවසයි.

2015 දී අවශ්‍ය කිරි ඉල්ලුම මෙන් ම ගවයින්ට අවශ්‍ය තෘණ වර්ග වගා කිරීම කෙරෙහි අපි අවධානය යොමු කර තිබෙන බව පශු සම්පත් හා ග්‍රාමීය සංවර්ධන අමාත්‍ය ආරුමුගම් තොන්ඩමන් මහතා පවසයි.

ආයතන 9ක් ඔස්සේ ඉලක්ක මෙහෙයවමින් කෘෂි ක්ෂේත්‍රය නංවාලීමට කටයුතු කරන බවත් ගොවි විශ්‍රාම වැටුප් අරමුදලට රුපියල් මිලියන 5,000ක් ඉදිරි වසර 3 සඳහා වෙන් කළ බවත් කෘෂිකර්ම නියෝජ්‍ය අමාත්‍ය වයි.ජී. පත්මසිරි මහතා පවසයි.

එජාපය 1977 දී බලයට එන විට කිරිපිටි සඳහා පිටරටට මුදල් ගියේ නැති නමුත් ඡන්දයට මුදල් දීපු අයට උදව් කිරීමට නවසීලන්තයෙන් කිරිපිටි ගෙන්වීමට ඉඩ දුන් බවත් මේ රටේ කිරි නිෂ්පාදනය නතර කරන්න මේ දේ කළ බවත් පශු සම්පත් සංවර්ධන නියෝජ්‍ය අමාත්‍ය එච්.ආර්. මිත්‍රපාල මහතා පවසයි.

කිසිදු විදේශ ආයෝජන සමාගමකට මේ රටේ මැණික් ගැරීමට හෝ පර්යේෂණ කිරීමට බලපත්‍ර නිකුත් කරන්නේ නැතැයි පරිසර හා පුනර්ජනනීය බලශක්ති අමාත්‍ය සුසිල් ප්‍රේමජයන්ත මහතා පවසයි.

විශාල ආදායමක් ලබන මැණික් කර්මාන්තය ආරක්ෂා කර ගෙන දියුණු කළ යුතු බවත් මේ හරහා ලක්ෂ ගණනක් ජීවත් වෙන බවත් රාජ්‍ය පරිපාලන හා ස්වදේශ කටයුතු පිළිබඳ අමාත්‍ය ඩබ්ලිව්.ඩී.ජේ. සෙනෙවිරත්න මහතා පවසයි.

මේ වන විට ඇමරිකන් ඩොලර් 4,000ක් දක්වා මෙරට ඒක පුද්ගල ආදායම ඉහළ ගොස් ඇති බවත් 2020 වන විට ඒක පුද්ගල ආදායම ඇමරිකානු ඩොලර් 7,500 දක්වා වැඩි කිරීම රජයේ අරමුණ බවත් සාම්ප්‍රදායික කර්මාන්ත හා කුඩා ව්‍යවසාය සංවර්ධන අමාත්‍ය ඩග්ලස් දේවානන්දා මහතා පවසයි.